Medio centenar de centros educativos de Galicia recibiron material cartográfico para participar no programa de innovación educativa ‘Sustentabilidade e paisaxe’

Medio centenar de centros educativos de Galicia recibiron material cartográfico para participar no programa de innovación educativa ‘Sustentabilidade e paisaxe’
O obxectivo desta iniciativa é ensinar aos alumnos a mirar e observar a paisaxe cunha sensibilidade especial para poder apreciar os aspectos positivos da mesma e concienciarse da necesidade de conservar o medio ambiente

Os case 400 profesores participantes son os encargados de promover a implicación activa do alumno, co fin de acadar un papel activo na sociedade


 No mapa sinálanse os colexios que forman parte desta iniciativa, así como un cadro co listado destes
No mapa sinálanse os colexios que forman parte desta iniciativa, así como un cadro co listado destes
Santiago de Compostela, 28 de abril de 2014.- Un total de 44 centros da Comunidade galega participan no programa de innovación educativa Sustentabilidade e paisaxe, que promove a Consellería de Medio Ambiente, Territorio e Infraestruturas, a través do Instituto de Estudos do Territorio. O IET vén de enviar material cartográfico co que traballar e establecer actividades relacionadas coa paisaxe, co obxectivo de poñer en marcha propostas de aula, con carácter innovador, no que a paisaxe se incorpore como obxecto de aprendizaxe, co fin de formar e concienciar ao alumnos no seu papel de voluntarios da paisaxe.

Trátase dunha iniciativa na que preto de 6.000 alumnos galegos adquirirán coñecementos sobre a súa capacidade de ler e interpretar a paisaxe dende unha mirada interdisciplinar, en función das súas idades (infantil, primaria, ESO, bacharelato e FP). Outra cifra que avala o éxito desta experiencia é a implicación de 370 docentes, un 55% máis respecto do curso anterior, responsables de 323 aulas, que promoven un total de 44 proxectos.

O profesorado é o encargado de promover unha participación activa do alumnado, vencellando os coñecementos curriculares cos espazos próximos cotiás, estimulando o desenvolvemento de habilidades sociais e persoais e proporcionando ao alumnado un rol activo na sociedade. Estas tarefas teñen por obxectivo conseguir que o alumnado:

• Se sinta protagonista e aprenda ao seu ritmo.
• Se enganche por medio da investigación lúdica.
• Sinta e exprese as emocións e sentimentos fronte á paisaxe.

En definitiva, proporcionar ferramentas básicas para espertar o interese pola paisaxe e a interpretación da evolución do territorio.

O persoal do Instituto de Estudos do Territorio realizaron varias visitas técnicas, para asesorar e expoñer os criterios xerais para o desenvolvemento dos proxectos de cada centro e resolver dúbidas.

A Consellería de Medio Ambiente, Territorio e Infraestruturas, a través do IET, segue apostando pola educación ambiental, e sobre todo por incorporar a paisaxe ao currículo educativo. Nese sentido, traballase activamente na xeración de coñecemento, a través da cartografía, para ser conscientes dos valores das paisaxes de Galicia, xa que unha das principais características de Galicia é a súa riqueza paisaxística.

O obxectivo non é outro que ensinar ao alumnado a mirar a paisaxe, dun xeito especial para poder apreciar a súa relación e dependencia coa súa contorna e valorar os aspectos positivos do mesmo, para así concienciarse da necesidade de conservar o medio ambiente.

En definitiva, ler a paisaxe propia para interpretar a historia e redactar o futuro, nos eidos da eficiencia ambiental e a cohesión social.

http://www.cmati.xunta.es/novas?content=nova_estandar0005.html

120 persoas poderán participar na programación gratuíta da Deputación na Casa das Ínsuas en Rábade

López Izquierdo salientou que a iniciativa forma parte do empeño do Centro de Interpretación Terras do Miño por levar accións que dean a coñecer o patrimonio natural lucense ós Concellos da provincia e destacou o “entorno privilexiado da Casa das Ínsuas para a celebración de actividades relacionadas co medio natural”.

Pola súa banda, os responsables da Asociación Galega de Custodia do Territorio agradeceu o apoio do organismo provincial na posta en marcha de actividades que dinamicen as instalacións que xestionan e destacaron o impulso á continuidade que con esta programación de inverno se lle dá o centro.

As actividades que se celebrarán na Casa das Ínsuas son:

- O día 6 de decembro, “Xornada de construción e instalacións de caixas niño”, no que os participantes construirán unha caixa niño para as aves da contorna que serán instaladas nas proximidades da casa das Ínsuas e nas que poderán aniñar paxaros, morcegos ou curuxas. Hai 20 prazas.
- O 20 de decembro terá lugar unha charla sobre “Conservación e xestión de humidais na Terra Chá”, dentro do ciclo de conferencias sobre a xestión da Reserva da Biosfera Terras do Miño, que ten un total de 50 prazas.
- O 21 de decembro, a charla “O cabalo de monte en Galicia” analizará a situación deste animal e a súa relación co medio natural así como os cambios lexislativos recentes. O local ten un aforo máximo de 50 persoas.
- O 10 de xaneiro celebrarase a charla “Conservación e xestión da flora e fauna na Reserva da Biosfera Terras do Miño”, dentro do ciclo de conferencias sobre a xestión da Reserva da Biosfera Terras do Miño, á que poderán asistir 50 persoas.
- O 11 de xaneiro terá lugar a xornada sobre “Produción láctea e conservación da natureza na Reserva da Biosfera Terras do Miño”, con 50 prazas.

Todas as actividades son gratuítas e para inscribirse só é necesario cubrir un sinxelo formulario na web www.deputacionlugo.org ou chamar ó 982 22-78-12 onde tamén poden obter máis información sobre as actividades.

A Casa das Ínsuas de Rábade está situada ó carón do Río Miño ó paso por esta localidade, unha contorna que favorece a organización de actividades didácticas e lúdicas sobre a natureza xa que permite a observación directa do medio natural. A Deputación participa na conservación e aproveitamento desta instalación e as súas proximidades con proxectos para dotala de contido e máis o acondicionamento de camiños, mellorando as súas comunicacións e facilitando o seu uso. A Asociación Galega de Custodia do Territorio é a encargada de impulsar e xestionar estas instalacións que pertencen ó Concello de Rábade e nas que diferentes entidades organizan actividades relacionadas co medio natural. Deputación e Asociación Galega de Custodia do Territorio están a traballar conxuntamente para realizar unha diagnose da zona que permita realizar propostas específicas para a conservación e a posta en valor do lugar.